Toshkentdagi “Rohat” aylanma yo‘lida ikki pog‘onali chorraha quriladi

20-avgust kuni Toshkent shahar hokimi Rahmonbek Usmonov Toshkent avtomobil halqa yo‘lining Ohangaron shossesi bilan kesishgan joyidagi "Rohat” aylanma yo‘lida yo‘llar ostin-ustun o‘tgan chorraha qurishni boshlash haqidagi hujjatni imzoladi.

Gazeta.uz’ning yozishicha, shahar ma’muriyati qurilishning aniq muddati hozircha noaniqligini ta’kidlagan.

Ma’lum qilinishicha, yangi obyekt qurilishi O‘zbekiston poytaxtida transport harakatini yaxshilash bo‘yicha tadbirlar doirasida ko‘zda tutilgan.

Qurilish munosabati bilan alohida turar joy va boshqa binolarni buzib tashlash rejalashtirilgan. Hokim qarorida ta’kidlanishicha, binolarni buzish ishlari buziladigan inshootlar egalariga yetadigan zarar hajmi bo‘yicha komissiya xulosasidan so‘ng boshlanishi kerak.

Daryo.uz